網紅的藏寶箱丫仁好耐都冇去睇展覽，呢一年長期處於點對點生活，放假都寧願留係屋企唔願去街行吓（以前絕對唔係咁）今次蜷川實花咁出名，之前拍小栗旬嘅《人間失格》同藤原龍也嘅《Diner》畫面靚到不得了！點都想出山望一望佢啲settings同相，順便扮下嘢打下卡。小弟知蜷川實花嘅時候，佢仲係一個攝影為主嘅攝影家，點解對佢印像咁深刻？想當年學生時期嘅小弟都好驚訝點解當時minimalism當道，實花嘅作品反而影咁多似花非花，顏色鮮豔彩度爆晒嘅作品！！當時確實係覺得好搶眼，直到日テレ嘅《24小時電視籌款節目》（2015？2016？）實花為節目製作籌款T恤，就更認識到佢背後嘅故事。
上野森美術館空間好細，兩層好快就行晒！但係你會見到蜷川實花成個人生轉變咁，特別係由佢老竇病到至離開人世嘅影相方法、場地表達嘅方法都比之前上一間房唔同，展覽就只被分成5階段。最尾一間房直頭模擬佢工作室嘅情景，雖然唔可以掂佢啲擺設，但場內觀眾就不斷運用場內各佈置去攞角度影靚相打卡。另外丫仁仲好留意展覽錶相嘅方法，點解唔係foamboard錶防水PP紙？丫仁係咪睇展覽仍然太皮毛呢？
Search